ఓ మహిళ నిర్లక్ష్యం.. 27 మందికి కరోనా

కరోనా కట్టడికి ప్రభుత్వాలు తీసుకోవలసిన అన్ని చర్యలు తీసుకుంటున్నాయి. పోలీసుల, వైద్యసిబ్బంది, పారిశుద్ధ్య కార్మికులు కరోనాతో ప్రత్యక్ష పోరాటం చేస్తున్నారు. అయితే, ప్రజలు కరోనా కట్టడిలో భాగం కాకపోతే, ఈ మహమ్మారిని అడ్డుకోవడం కష్టం. చాలా ప్రాంతాల్లో ప్రజలు నిర్లక్ష్యంగా వ్యవహరిస్తూ.. కరోనా వ్యాప్తికి అవకాశం ఇస్తున్నారు. తాజాగా ఓ మహిళ నిర్లక్ష్యానికి 27 మందికి కరోనా సోకింది. రాజస్థాన్ లో జోధ్‌పూర్‌లో ఓ వివాహానికి హాజరైన 27 మందికి కరోనా సోకిందని వైద్యులు నిర్థారించారు. కరోనా బారిన పడిన మహిళ ఈ వివాహానికి హాజరైందని.. దీంతో, ఆ వివాహానికి హాజరైన 27 మందికి కరోనా సోకిందని అధికారులు తెలిపారు. ఆమెకు కరోనా పాజిటివ్ అనే విషయం ఎవరికీ తెలియజేయలేదని అన్నారు. ప్రభుత్వాలు, అధికారులు ఎంత శ్రమించినా.. ప్రజలు స్వీయ రక్షణ పాటించకపోతే కరోనా వ్యాప్తిని అడ్డుకోవడం సాధ్యం కాదని అన్నారు.