అయోధ్యలో 'అపోలో హాస్పిటల్స్' ఎమర్జెన్సీ మెడికల్ సెంటర్.. యాత్రికులకు ఉచిత వైద్యం
అయోధ్యలోని శ్రీరామ జన్మభూమి తీర్థయాత్రలో అత్యాధునిక మల్టీ స్పెషాలిటీ అత్యవసర వైద్య కేంద్రాన్ని ప్రారంభిస్తున్నట్లు అపోలో హాస్పిటల్స్ గ్రూప్ సోమవారం ప్రకటించింది. ఈ సెంటర్‌లోని అధునాతన సేవల గురించి అపోలో హాస్పిటల్స్ గ్రూప్ చైర్మన్ డాక్టర్ ప్రతాప్ సి.రెడ్డి మాట్లాడుతూ.. ఈ సెంటర్‌లో విస్తృత స్థాయిలో మెరుగైన వైద్య సేవలు అందుబాటులో ఉంటాయన్నారు. ఇవి ప్రాథమిక ప్రథమ చికిత్స నుండి స్ట్రోక్‌తో సహా అత్యవసర వైద్య సేవల వరకు ఉన్నాయని ఆసుపత్రి విడుదల చేసిన ఒక ప్రకటనలో తెలిపారు.
ఈ కేంద్రంలో పెద్దలు, పిల్లలకు 24×7 క్రిటికల్ కేర్ సపోర్ట్, ICU బ్యాకప్ కూడా ఉంటుందని డాక్టర్ రెడ్డి చెప్పారు. ఈ ఆసుపత్రి నిర్మాణ పనులు త్వరలో ప్రారంభం కానున్నాయి.
ప్రకటన ప్రకారం, తాజా టెలిమెడిసిన్ టెక్నాలజీ ద్వారా ఆన్‌లైన్ సూపర్ స్పెషాలిటీ కన్సల్టేషన్ కేంద్రంలో అందుబాటులో ఉంటుంది. దీని ద్వారా, స్పెషలిస్ట్‌లకు రోగి యొక్క పరిస్థితి తెలుసుకోవడం సులభం అవుతుంది.
దాదాపు 5,000 చదరపు అడుగుల విస్తీర్ణంలో ఎమర్జెన్సీ మెడికల్ సెంటర్‌ను నిర్మించనున్నారు. శ్రీరామ్ లల్లా దర్శనానికి వచ్చే యాత్రికులకు కేంద్రంలో వైద్య సేవలు పూర్తిగా ఉచితం.
అపోలో హాస్పిటల్స్ లక్నో నిర్వహిస్తున్న ఈ సెంటర్ సేవలు మా అంకితభావానికి నిదర్శనమని అపోలో హాస్పిటల్స్ లక్నో ఎండి మరియు సిఇఒ డాక్టర్ మయాంక్ సోమాని అన్నారు. అయోధ్యను సందర్శించే యాత్రికుల ఆరోగ్యం, శ్రేయస్సు పట్ల అపోలో హాస్పిటల్స్ నిబద్ధతతో వ్యవహరిస్తుందని ఆయన అన్నారు.
