అయోధ్యలో అతి పెద్ద మసీదు నిర్మాణం.. ఏప్రిల్‌లో ప్రారంభం
ప్రపంచంలోనే అతిపెద్ద ఖురాన్, మెగా అక్వేరియం, హాస్పిటల్ & వెజ్ కిచెన్.. ఇవన్నీ అయోధ్యలో నిర్మించే మసీదులో ఏర్పాటు చేయనున్నారు. ఇందుకు సంబంధించిన పనులు ఈ ఏడాది ఏప్రిల్‌లో ప్రారంభం కానున్నాయి. మసీదు అభివృద్ధి కమిటీ చీఫ్ హాజీ అరాఫత్ షేక్ మాట్లాడుతూ, ఈ మసీదు ఒకేసారి 9,000 మంది నమాజీలకు ఆతిథ్యం ఇవ్వగలదని అన్నారు. ఈ మసీదు యుపిలో ప్రధాన పర్యాటక ఆకర్షణగా నిలుస్తుందని అన్నారు.
రామ మందిర ప్రారంభోత్సవం తర్వాత, ఉత్తరప్రదేశ్‌లోని టెంపుల్ టౌన్ అయోధ్యలో మహమ్మద్ బిన్ అబ్దుల్లా మసీదు నిర్మాణం కూడా జరగనుంది. జాతీయ మీడియాకు ఇచ్చిన ప్రత్యేక ఇంటర్వ్యూలో, మసీదు అభివృద్ధి కమిటీ చీఫ్ మరియు ఇండో-ఇస్లామిక్ కల్చరల్ ఫౌండేషన్ (ఐఐసిఎఫ్) సభ్యుడు హాజీ అరాఫత్ షేక్ మాట్లాడుతూ.. ఈ ఏడాది ఏప్రిల్ నుండి మసీదు నిర్మాణం ప్రారంభమవుతుందని చెప్పారు. మసీదు కొత్తగా రూపొందించిన బ్లూప్రింట్‌ను పంచుకుంటూ, దుబాయ్‌లో ఉన్న దానికంటే పెద్దగా ఉంటుందని, ఐదు మినార్‌లు, అక్వేరియం ఉన్న భారతదేశపు మొట్టమొదటి మసీదు ఇదే అని అన్నారు.
బాబ్రీ మసీదుకు బదులుగా అయోధ్యలోని ధన్నీపూర్ గ్రామంలో కేటాయించిన ఐదు ఎకరాల స్థలంలో మసీదు నిర్మాణాన్ని పర్యవేక్షించేందుకు ఉత్తరప్రదేశ్ సున్నీ సెంట్రల్ వక్ఫ్ బోర్డు (UPSCWB) ఏర్పాటు చేసిన ట్రస్ట్ IICF. ధన్నీపూర్‌లోని మసీదు అభివృద్ధికి UP సున్నీ సెంట్రల్ వక్ఫ్ బోర్డు నామినేట్ చేసిన షేక్, BJP నాయకుడు, మహారాష్ట్ర స్టేట్ కమిషన్ ఫర్ మైనారిటీ మాజీ చైర్‌పర్సన్. అతను అనేక సామాజిక కార్యక్రమాలు చేపట్టిన ప్రముఖ సామాజిక కార్యకర్త కూడా.
పవిత్రమైన మసీదును స్థాపించే పనికి 25 కోట్ల మంది ముస్లింల నుండి నన్ను ఎన్నుకోవడం నా అదృష్టంగా భావిస్తున్నాను. ఈ మసీదు ఇస్లామిక్ నిర్మాణంలో అద్భుతంగా ఉంటుంది. మేము దీనిని ప్రపంచంలోని అత్యంత అందమైన మసీదులలో ఒకటిగా అభివృద్ధి చేయడానికి ప్లాన్ చేస్తున్నాము. ఇలాంటి ప్రాజెక్టులకు సమయం పడుతుంది అని హాజీ అరాఫత్ షేక్ అన్నారు. ఇన్షా అల్లాహ్, ఎట్టకేలకు ఈ రంజాన్ తర్వాత పనులు ప్రారంభమవుతాయి అని ఆయన తెలిపారు.
మొదట్లో ఈ నిర్మాణానికి ధన్నీపూర్ మసీదు అని పేరు పెట్టారు. కొందరు మస్జిద్-ఎ-అమాన్ పేరును కూడా సూచించారు. మరి కొందరు ప్రసిద్ధ స్వాతంత్ర సమరయోధుడు మౌల్వీ అహ్మదుల్లా షా ఫైజాబాదీ పేరు పెట్టారు. చివరకు మొహమ్మద్ బిన్ అబ్దుల్లా మసీదుగా మార్చబడింది. అంతిమంగా ఇదే పేరుతో మసీదు ఉంటుందా లేక మరో పేరు మారుస్తారా అనేది చూడాలి.
