Corona in China: మరోసారి కరోనా విజృంభణ.. రోజు రోజుకు పెరుగుతున్న కేసులు..
Corona in China: ప్రపంచ దేశాలను వణికిస్తున్న కరోనా వైరస్ అదుపులోకి వచ్చింది అని అనుకుంటున్న తరుణంలో, చైనాలో ఈ వైరస్ వ్యాప్తి మళ్లీ మొదలైంది. ఇన్ఫెక్షన్ల సంఖ్య రోజు రోజుకి పెరుగుతోంది. ప్రపంచవ్యాప్తంగా తీవ్ర ఆర్థిక నష్టం, ప్రాణనష్టం కలిగించిన కరోనా వైరస్ తొలిసారిగా చైనాలో కనిపించింది. 2019 సంవత్సరంలో, కోవిడ్-19 అని పిలువబడే కరోనావైరస్ చైనాలోని వుహాన్ నగరంలో వ్యాపించింది. ఈ వైరస్ గుర్తించిన నెలరోజుల్లోనే ప్రపంచమంతటా వ్యాపించింది.
తత్ఫలితంగా, ఇది ప్రపంచవ్యాప్తంగా తీవ్రమైన ఆర్థిక నష్టం, ప్రాణనష్టం కలిగించింది. ప్రపంచ వ్యాప్తంగా కరోనా తీవ్రత తగ్గినప్పటికీ చైనాలో మాత్రం తగ్గలేదు. రోజువారీ కేసులు చైనాకు కొత్త తలనొప్పులు తెచ్చిపెడుతోంది. వ్యాధి వ్యాప్తి చెందకుండా ఉండటానికి చైనా అనేక ఆంక్షలు విధించినప్పటికీ, ప్రజలు వాటిని ఖాతరు చేయకపోవడంతో కేసుల సంఖ్య పెరుగుతోందనిప్రభుత్వం ఆరోపిస్తోంది. కర్ఫ్యూకు వ్యతిరేకంగా నగరాల్లో నిరసనలు జరిగాయి. ప్రజల నిరసన కారణంగా, చైనా ప్రభుత్వం వివిధ ప్రదేశాలలో కర్ఫ్యూ ఆంక్షలు తొలగించింది.
ప్రస్తుతం చైనాలో కరోనా మరణాలు పెరుగుతున్న విషయాన్ని దాచిపెడుతోందని వార్తలు వస్తున్నాయి. చైనాలోని ప్రధాన నగరాల్లోని శ్మశానవాటికల్లో రోజుకు 100కు పైగా శవాలు పేరుకుపోతున్నాయని వార్తల సారాంశం. గత కొన్ని రోజులుగా మృతుల సంఖ్య పెరుగుతూనే ఉంది. సరిపడా సిబ్బంది లేకపోవడం, ఉన్న సిబ్బందిలో కరోనా ఇన్ఫెక్షన్ వంటి సమస్యలు ఉన్నాయని, ఇది ఇలాగే కొనసాగితే చివరికి మరికొన్ని కొత్త సమస్యలు ఉత్పన్నమవుతాయని అంటున్నారు. వివిధ నివేదికల ప్రకారం, వచ్చే ఏడాది ఏప్రిల్ నాటికి కరోనా ఇన్ఫెక్షన్ల సంఖ్య 3 లక్షలకు పైగా ఉంటుందని అంచనా. చైనా జనాభాలో మూడింట ఒక వంతు మందికి కరోనా సోకినట్లు సమాచారం వెలువడడం ప్రపంచ ప్రజలను భయభ్రాంతులకు గురిచేస్తోంది.
© Copyright 2024 : tv5news.in. All Rights Reserved. Powered by hocalwire.com